எந்தன் கண்ணுக்குள்ளே உன்னைப் பாரு

 பல சமயங்களில் நாம் பெறும் சில உணர்வுகளை  நம்மால் சொல்லில் வடிக்க முடியாத போது  அதை அப்படியே படம் பிடித்தது போல் ஒருவர் வார்த்தைகளில் உருவகித்து விட்டால் நம்முடைய இயலாமை என்ன என்பதை புரிந்து கொள்ள முடிகிறது.

அகத்தின் அழகு முகத்தில் தெரியும் என்பது தமிழ் பழமொழி. ஆங்கிலத்தில் இதை " Face is the index of the mind' என்பர். ஆனால் பிராணிகளின் கண்களில் நாம் காணும் உணர்வுகளை எப்படி உள் வாங்குகிறோம்?

ஒரு பசுவின் கண்களில் இருக்கும் அமைதி, மானின் கண்களில் உள்ள மிரட்சி, புலி அல்லது சிங்கத்தின் கண்களில் காணப்படும் தன்னம்பிக்கை  என்று சொல்லிக் கொண்டே போகலாம்.  அவைகளுடைய குட்டிகளின் கண்களில் தெரியும் ஒரு அப்பாவியான கண்ணோட்டத்தை எப்படியெல்லாம் கார்ட்டூன் படங்களில் சித்தரிக்கின்றனர் என்பதை பார்க்கும் போது ஆச்சரியம் மேலிடுகிறது.

சரி விஷயத்திற்கு வருவோம்.

சமீபத்தில் ஒரு சிம்பன்சி குரங்கை கணினியில் வரைந்து பல வாட்ஸாப் குழுமங்களில் பகிர்ந்து கொண்டேன்.  பலரும்  அதன் கண்களை மிகவும் சிலாகித்து நல்ல உயிரோட்டத்துடன் இருக்கிறது என்று பாராட்டினர்.  இதற்கான காரணம் கீழ்கண்ட  மேற்கோளை கண்டபின் தான் நமக்குள் எழுகின்ற உணர்வுக்கு  எப்படி உருவகம் கொடுத்துள்ளார் என்பது புரிந்தது.

If we look straight and deep into a chimpanzee's eyes, an intelligent self-assured personality looks back at us. If they are animals, what must we be?”
― Frans de Waal

மனிதர்களின் மரபணுக்களில் 98 விழுக்காடு ஒத்துபோகும் மனிதக் குரங்குகளின் வாழ்க்கைமுறையும் கூட்டுக் குடும்பமாகவே காணப்படுகின்றன. அவைகளின் ஆயுளும் 60 வயது வரை நீடிக்கும்.

மனிதர்களுக்கும் சிம்பன்சி குரங்களுக்கும் சில பொதுவான குணங்கள் உண்டு என்கின்றனர்.  

 அனுதாபம் :  சிம்பன்சிகளுக்கும் சந்தோஷம், குறும்பு, விளையாட்டு போன்ற குணங்கள் உண்டு. கூடவே  பிறனுடைய கஷ்டத்தை தம்முடையதாக பாவிக்கும் பண்பும் உண்டு.  உதாரணத்திற்கு அனாதரவான இளம் குட்டிகளை தத்து எடுத்து தம் அரவணைப்பில் வளர்க்கும் குணமுடையன இவை. ஆபத்துகாலத்தில் மனிதர்களின் உதவிக்கும் விரைந்து செயலாற்றக் கூடியன.

பெரியோருக்கு மரியாதை : கூட்டுக்குடும்பம்  நிலைத்து நிற்க இது மிகத் தேவை போலும். மூத்த உறுப்பினர்கள் இளம் தலைமுறைக்குத் தேவையான வாழ்க்கை முறை அனத்தையும் கற்றுத்தருகின்றன. பிறந்ததிலிருந்து சில வருடங்கள் வரை தாயினுடைய அணைப்பிலேயே வளருகின்றன. 

இவைகளின் முகம் மற்றும் கைகளின் உரோம வளர்ச்சி அல்லது வர்ண மாற்றங்களைக் கொண்டு அவைகளின் வயது வித்தியாசப்படுவதை அறிந்து கொள்ள முடிகிறதாம். முக்கியமாக தக்க வயதினரிடையே இனச்சேர்க்கைக்கு இது ஒரு முக்கிய அளவுகோலாகக் கொள்ளப்படுகிறதாம்.

பிரச்சனைக்குத் தீர்வு காண்பதிலும் மிக புத்திசாலித்தனமாகவும் கூட்டு முடிவு எடுப்பதிலும் மனித குரங்குகள் தம் தனித்தன்மையை வெளிப்படுத்துகின்றன. பல சமயங்களில் தேவைப்படும் போது காட்டில் கிடைக்கும் பொருட்களைக் கொண்டே பிரத்யேக சாதனங்களை உருவாக்கும் திறமை வாய்ந்தவை அவை. 

இதையெல்லாம் வைத்து பார்க்கும் போது  Frans de Waal  சொல்வது போல் " .....if they are animals what must we be? " என்று கேட்கத்தான் தோன்றுகிறது. 

 [- இவரைப் பற்றி அறிய   இங்கே சுட்டவும்   ] 

நம்ம ஊர் பழைய திரைப்படப் பாடலையும் நினைவூட்டுகிறது. " எந்தன் கண்ணுக்குள்ளே உன்னைப் பாரு"

வடிவான வண்ண மூக்கான் -டூகான்

 மனிதர்களில் யாராவது  பொறுப்பு இல்லாமல் அதிகம் பேசினால் 'ரொம்ப வாய் நீளம்' என்று சொல்வதுண்டு.  தென் அமெரிக்காவில் ஒரு வகைப் பறவைக்கு  நிஜமாகவே எல்லாவகையிலும் வாய் நீளம்தான். 

டூகான் ( Toucan)  என்றழைக்கப்படும் இப்பறவைகள் மிகவும் இரைச்சல் வாய்ந்தவையாம்.  அதுவும்  பிற பறவைகள் யாவும் அமைதியாக இருக்கும் மதிய  நேரங்களில் தான் இவைகளின் தனிக் கச்சேரி.

ஆப்பிரிக்காவில் காணப்படும் ஹார்ன்பில் பறவைகளைப் போன்றே மிகப் பெரிய எடுப்பான அலகுகள் கொண்டிருந்தாலும் இவைகள் முற்றிலுமாக வேறு பிரிவை சேர்ந்தவை. இவைகளை மரங்கொத்தி பறவைகள் வகையில் சேர்க்கின்றனர். பழங்களை மிகவும் விரும்பி சாப்பிடும் இப்பறவைகள் புழு பூச்சி மாமிசம் போன்றவற்றையும் கூட தின்னும் ஒரு சர்வ பட்சிணி. 

கிளிகளை போலவே இவற்றையும் பிடித்து வந்து வீட்டில் வளர்க்கின்றனர் மேல்நாட்டவர். காடுகளில் இவை சிறு சிறு கூட்டமாக வாழும்.  மரப்பொந்துகளில் முட்டையிட்டு குஞ்சு பொறிக்கும்.

முழுவதும் வளர்ந்த டூகானின் நீளம் 25 அங்குலம். அதில் மூன்றில் ஒரு பங்கு (7.5 அங்)  அதன் அலகே ஆக்கிரமித்துக் கொள்கிறது. எப்படி இவ்வளவு பெரிய அலகை தூக்கிக் கொண்டு பறக்கிறது என்ற ஆச்சரியம் ஏற்படலாம்.  உண்மையில் அவை மிகவும் எடைகுறைந்த  கெரடின் (keratin) என்கிற பொருளால் ஆனது. நமது உடலில்  நகங்கள், தலைமுடி போன்றவையும்  இதே கெரடினால் வளர்பவை. ஆகையால் தான் அதன் அலகு ஒரு சுமையே அல்ல.

இதன் ஆயுள் சுமார் இருபது வருடங்கள்.

சாதாரணமாக பல வண்ணச் சிறகுகளை பறவைகளில்  காணும் நமக்கு டூகானின் பல வர்ணங்களுடைய அலகுகளே ஒரு புது விஷயம். இந்த விஷயத்தில் முற்றிலும் மாறுபட்டவை இவை. டூகானின் ஒரு அழகிய வண்ணப்புகைப் படத்தை மொபைல் ஸ்க்ரீன்சேவராக கண்ட போது அதை என் வரைபட புத்தகதில் வரைந்து கொண்டேன். வர்ணப்பென்சிலில் வர்ணமும் பூசிப் பார்த்தேன். அதை வலது பக்கத்தில் காண்கிறீர்கள்.

இன்னமும் பளிச்சென்று வரவேண்டும் என்று தோன்றியது. இருக்கவே இருக்கிறது நம் கணினி.

வரைந்த படத்தை ஸ்கேன் செய்து அதில் டிஜிடல் வர்ணத்தை பூசினேன்.  இப்போது குடும்பப் பெண்ணுக்கு நட்சத்திர அலங்காரம் செய்தது போல் பளிச்,பளிச், -காமெரா ரெடி !!!

மனிதர்களுக்குத் தான் அலங்காரம் செய்து அழகு பார்க்க வேண்டியிருக்கிறது, இறைவனின் படைப்பில் வேறு எல்லாமுமே இயற்கையிலேயே மிகவும் அழகு வாய்ந்தவை தான்-காமெரா ரெடி தான்,

இல்லாவிட்டால் அந்த ஸ்க்ரீன்சேவர் என் மனதை கவர்ந்திருக்குமா?

மயிரிழையில் ஊசலாடும் திறமை

 நாம் வரைகின்ற ஒரு ஓவியத்தின் சிறப்பே அதில் காணப்படும் நுணுக்கங்களில் அடங்கி இருக்கிறது. இதை ஆங்கிலத்தில் detailing என்று சொல்கிறார்கள். அது  பறவைகளின் சிறகாகவோ  மரம் செடிகளின் இலை வடிவங்களோ, துணியின் இழைகளோ எதுவாக வேண்டுமானாலும் இருக்கலாம். 

இதில் வெள்ளைத்தாளில் வரையும் படங்களில் வெள்ளை வர்ணங்களை பிரித்துக் காட்ட  முயலும் போதுதான் பிரச்சனை ஆரம்பிக்கிறது. குறிப்பாக நரை முடி, தாடி போன்றவை சரியாக வராது. அப்போது அதன் உயிரோட்டமே குன்றி விட்ட மாதிரி தோன்றும். 

இந்த  குறையை, என்  திணறலை, என்னுடைய பழைய பதிவுகளில்- பாலசந்தர்   பிஸ்மில்லாக்கான்     காஞ்சி பெரியவர்  போன்றவர்களின் படங்களைப் பார்த்தால்    வாசகர்களுக்குப் ஓரளவு புரியும்.

சமீபகால சில யூட்யூப் காணொளிகளில், பின்னணியில் சற்றே grey shade காட்டி  அதன் மேல் வெள்ளை வர்ணத்தை தூரிகையால் காட்ட வேண்டும் என்று சொல்கிறார்கள்.  பென்சில் வரைபடமானால் -சில சித்திர விற்பன்னர்களின் முறைப்படி - ஊசி முனையினால் கீறிக் கொண்டு வரையும் விதத்தை  வெளிப்படுத்தியுள்ளார்கள்.  பயன்படுத்தும் வரைதாள் சற்று தடிமனாக இருக்க வேண்டும்..

   

இன்னும் விவரமான காணொளி ( https://www.youtube.com/watch?v=RQ1rdwMycy4)

ஆனால் இதில் ஒரு விஷயம் என்ன புரிந்தது என்றால் இதற்கு பயன்படுத்தப்படும் வரைதாள் மற்றும் பென்சில்களின் -சார்கோல்- தரம் இவற்றைப் பொருத்து வரைபடத்தில் அதன் பரிமாணம் வெளிப்படும்.

சமீபகாலமாக நான் கணினி முறையில்  படம் வரைதலை பழகி வருவதால் இதையும் ஒரு முறை முயற்சி செய்து பார்க்கலாம் என்று தோன்றியது. அதன் விளைவே கீழே காணும் படம்.

இதற்கு நான் பயன்படுத்திய மென்பொருள் Krita மற்றும் Paint 3D .

Krita வில் முக்கியமாக படம் வரைவதற்கும் பின்னர்  3D வர்ணம் பூசுவதற்கும் பயன்படுத்தினேன். நரைமுடி தாடி விஷயத்திற்கு வருவோம். இந்த மென்பொருட்களில் இருக்கும்  நீர்வண்ண பிரஷ் , பென்சில் , ஆயில் கலர், கிரேயான், போன்றவற்றுடன் Fine tip pen என்ற ஒன்றையும் கொடுத்திருக்கிறார்கள். அதை பயன் படுத்தியே மேலே காணும் மயிரிழைகளை ஓரளவு இயற்கையாக கொண்டு வர முடிந்தது. 

இதிலிருந்து என்ன தெரிகின்றது என்றால் நல்ல உபகரணங்கள் இருந்தால் கிட்டத்தட்ட பாதி வேலை முடிந்த மாதிரிதான்.  என்னுடைய பழைய முயற்சிகளை விட இம்முறை சற்று முன்னேற்றம் கண்டிருக்கிறேன்  என்ற மன நிறைவும் வருகிறது. 

இதைத்தான் மயிரிழையில் ஊசலாடும் திறமை என்கிறேன் :)))

சித்திரமும் மவுஸ் பழக்கம் - 5 :

      வெகு நாட்களுக்குப் பின் இன்னொரு படத்தை கணினி மென்பொருளைக் கொண்டு  வரைய முயற்சி செய்தேன்  -Digital colouring. 

அதன் விளைவே கீழே காணும்  படம். பென்சிலால்  காகிதத்தில் வரைந்து பின்னர் ஒளிவருடி (scanner) மூலம் கணினிக்கு ஏற்றினேன். அதன் பின்னர் வர்ணங்களை மைக்ரோசாஃப்ட்  Paint 3 D மென்பொருள் கொண்டு பூசினேன்.  முழு படத்தையும் பதிவின் கடைசியில் பார்க்கலாம்.  சரி , யார் இவர் ?

 

சென்ற நுற்றாண்டில்  வாழ்ந்து  மக்களிடையே தர்மத்தின் அவசியத்தை போதித்த   மகான் ஸ்ரீ ஸ்ரீதர சுவாமிகளே இவர். 

இவரை தமிழ் நாட்டில் பலருக்கும் தெரியாது. ஸ்ரீ தத்தாத்ரேயரின் வழி அவதூதராகக் கருதப்படும் இவரது வரவு பற்றி பல நூறு ஆண்டுகளுக்கு முன்பே ஸ்ரீபாத ஸ்ரீவல்லப சரிதாம்ருதத்தில் குறிப்பிடப்பட்டுள்ளது. குறிப்பாக அத்தியாயம் நாற்பத்தியொன்றில் "ஸ்ரீதரன் என்ற மகாயோகியின் சீடர்கள் மூலம்  தன் பிறந்த ஊரான  பிதாபுரத்தில்  ஒரு சமஸ்தானம் எழுப்பப்பட்டு தன் பாதுகைகளை வைத்து பூஜிக்கப்படப்  போவதை   அறுநூறு ஆண்டுகளுக்கு  முன்பே ஸ்ரீபாத வல்லபர் சொல்லி வைத்திருக்கும் செய்தியை படிக்கலாம்..

   அவர் சொல்லியபடியே மஹான் ஸ்ரீதரின் சீடரான சஜ்ஜனகடா ஸ்ரீராமஸ்வாமியின் பெரு முயற்சியால் பிதாபுரத்தில் ஸ்ரீபாத வல்லபரின் சமஸ்தானம் 1960 களில் எழுப்பப்பட்டு  வெகு விமரிசையாக  இப்போது ஸ்ரீ தத்த ஆராதனை நடைபெற்று வருகிறது.  கீழே உள்ள காணொளியில் ஸ்ரீ ராமஸ்வாமி தன் குருவிற்கு குரு பூர்ணிமையன்று செய்யும் பூஜையை காணலாம். 

ஸ்ரீ ஸ்ரீதர சுவாமிகள் கர்நாடகாவில் குல்பர்கா அருகே சின்சோலி என்ற கிராமத்தில் டிசம்பர் 7 ஆம் தேதி 1908 வருடம் அவதரித்தார்.

    ரிஷிகேஷ் சுவாமி சிவானந்தா இவரைப் பற்றி சிஷ்யர்களிடம் குறிப்பிடும் போது “நான் மிகவும் கால்நடையாகவே  நாடெங்கும் சுற்றியிருக்கிறேன். ஸ்ரீதர சுவாமிகளைப் போல தேஜஸ்வியும் தபஸ்வியும் கண்டதில்லை. அவர் இயல்பிலேயே அகண்ட பிரம்ம நிஷ்டையில் உள்ள பூரண ஞானி.” என்று சொல்லியிருக்கிறார்.

     மா ஆனந்த மயி ஸ்ரீதர சுவாமிகளை சந்தித்தப்பின் “பரமார்த்தம் என்னும் சிகரத்தை அடைய மிக குறுகிய கஷ்டமான மலைப்பாதையில் நாம் பயணித்துக் கொண்டிருக்கிறோம்.ஸ்ரீதர சுவாமிகளோ ஏற்கனவே அதன் உச்சியை அடைந்து நிலைப்பெற்று விட்டவர்” என்பதாக அவருடைய அனுபவத்தைக் கூறியிருக்கிறார். 

 மகரிஷி இரமணர் காலமான பிறகு அவருடைய அணுக்கத் தொண்டரான பிரபாவதி ராஜே ஸ்ரீ ஸ்ரீதர சுவாமிகளை தரிசித்து ஆசிர்வாதம் பெற்ற பின் “ சுவாமிகள் முன்னிலையில் ஸ்ரீ இரமணரையே உணர்ந்தேன்” என்றார். 

   1958 December  4 தேதி  சென்னை வந்திருந்தபோது தாம்பரத்திற்கு அருகே ஒரு பள்ளியில் ஸ்ரீ ஸ்ரீ சந்திரசேகர சரஸ்வதி (பெரியவா என்று அன்புடன் அழைக்கப்படும் பரமாச்சாரியார்) அவர்களை ஸ்ரீதரர் சந்தித்து அளவளாவினார். அவருடைய உரையின் மையக்கருத்தை பரமாச்சாரியரே தமிழில் எல்லோருக்கும் புரியும்படியாக விளக்கியபின் “நரன் நாராயணன் ஆக முடியும் என்பதற்கு ஸ்ரீ ஸ்ரீதர சுவாமிகளே ஒரு ஆதர்சமாகும்” என்று அவரின் தவ வலிமையைப் போற்றினார்.

     சமர்த்த ராமதாசரே தருமத்தை நிலைநாட்ட மீண்டும் அவதரித்துள்ளார் என்று பலரும் நம்பினர். அவர் பல ஆண்டுகள் வெளி உலக தொடர்பு இன்றி தனிமையில் தவமியற்றினார். 

   ஷிவமொக்கா அருகே வரதாபுரம் என்கிற அவருடைய ஆசிரமத்தை, ஸ்ரீ சத்யசாயி பாபா அவருடைய குழாத்துடன் அடைந்தபோது யாவரையும் நிசப்தத்துடன் இருக்கும்படி கூறி அங்கே தவமியற்றுபவர் சாட்சாத் பிரம்மாவே என்றுரைத்தார். ஸ்ரீதர சுவாமிகளும் சிறிது நேரம் வெளியே வந்து யாவரையும் ஆசீர்வதித்தார். 

 1927-ல் ராமநாமத்திலும், சுவாமி சமர்த்த ராமதாசரின் தாசபோதத்திலும் ஈடுபாட்டுடன் மேற்கொண்ட தவ வாழ்க்கை பெரும்பாலும் ராமதாசரின் சமாதியுள்ள ஸஜ்ஜனகடாவிலும் பின்னர் வரதாபுரத்திலும் கழிந்தது. 

ஸ்ரீ ஸ்ரீதர சுவாமிகள் இந்தியா முழுவதும் சுற்றுப்பயணம் செய்து சனாதன தருமத்திற்கு புத்துயிர் கொடுத்தார். கடைசி எட்டு ஆண்டுகள் தனிமையில் வரதாபுரத்தில் தவம் செய்து 19-4-1973 அன்று மஹாசமாதி அடைந்தார். 

 அவர் பன்மொழி புலமைபெற்றவர். வடமொழி,கன்னடம், மராத்தி, ஹிந்தி ஆங்கிலம் தெலுங்கு என எல்லா மொழியிலும் பேசி எழுதும் திறமை பெற்றிருந்தார். வடமொழி, மராத்தி கன்னடத்தில் அவர்கள் பல நூல்களை எழுதியுள்ளார்.  அவரைப் பற்றிய மேலும் தகவல்களுக்கு  இங்கே  சுட்டவும் .

                                                 (பெரிதாக்கிப் பார்க்க படத்தை சுட்டவும்)

மேபிள் சருக்கரை சுவைத்துள்ளீர்களா?

இந்த பதிவில் இரண்டு விஷயங்களைப் பார்ப்போம். ஒன்று வலைப்பூவிற்கு சம்பந்த்தப்பட்ட சித்திரம். இரண்டாவது சித்திரத்திற்கு காரணமான பொருள்.

புதிதாக ஒரு கணினி வரைபட தகடு (graphic tablet) ஒன்றை வாங்கினேன்.  அதைப்பற்றிய சற்று விவரம் :

கணினியின் உதவியுடன் நான் பலநாட்களாக வரைபடங்களுக்கு வர்ணம் பூசி வந்தாலும் நேரடியாக படம் வரைவதில் அதிகம் வெற்றி பெறவில்லை. இதற்குக் காரணம்  காகிதத்தில் வரையும் போது பென்சிலில் கிடைக்கும் விரல்களின் வீச்சு (strokes) கணினியில் இல்லாமல் போனதால் தான். இது எனக்கு மட்டுமில்லை, உலகில் உள்ள ஓவியர்கள் அனைவரின் மனக்குறையாகவும் இருந்து வந்தது.

இந்த குறையை போக்குவதற்காக வந்ததே வரைபடத் தகடு.   இதில் நாம் Stylus  அல்லது எழுத்தாணி [இங்கே வரையாணி ]  கொண்டு கணினியுடன் இணைக்கப்பட்ட ஒரு தகட்டில் படம் வரையும் போது கணினியின் திரையில் படம் தெரிகிறது.  ஆனால் தகட்டில் ஏதும் இருக்காது !

நாம் தரும் அழுத்தத்திற்கு ஏற்ப கோடுகளின் பரிமாணமும் வர்ண அழுத்தமும் மாறுபட்டு தூரிகைளைக் கொண்டு வரையும் அனுபவத்தை தருகிறது. பல யூ டியூப் காணொளிகளில் அவற்றைக் காணலாம். இதற்கு பல வித மென்பொருட்களில் பயிற்சி வேண்டும்.  வரைப்படத்தகட்டின் வேலை வெறும் காகிதத்தையும் பென்சில் அல்லது தூரிகைகளின் இடத்தை நிரப்புவதுவே. 

நான் இதைப் பற்றி சிந்தித்ததற்குக்  காரணம் முக்கியமாக

1.எந்த அளவில் (Canvas size) வேண்டுமானாலும் படம் வரையலாம். அதற்கு வர்ணங்கள் வாங்காமலே வர்ணம் பூசலாம். 

2. பென்சில், சார்கோல், நீர்வர்ணம், ஆயில் வர்ணம், பேஸ்டல், அக்ரிலிக் என பலவகையான வர்ண முறைகளையும் முயன்று பார்க்கலாம்.

3. எத்தனை நாட்களுக்குப் பிறகும் சித்திரங்களை சரிசெய்யலாம். 

4..படத்தை வரைந்து முடித்த பிறகு அதை பாதுகாத்து வைப்பதற்கு (இடம் தேடி) சிரமப்பட வேண்டாம். 

5.எப்பொழுது வேண்டுமானாலும் எந்த அளவிற்கு வேண்டுமானாலும் கணினியிலிருந்து பிரிண்ட் செய்து கொள்ளலாம். அல்லது 

6 சட்டம் போட்டு சுவரில் மாட்டாமல் Slide Show ஆக நம் வீட்டு தொலைக்காட்சி திரையில் பிறருக்குக் காட்டலாம்.  சிறிய படமாயினும் திரையில் பெரிதாகத் தெரியும் !

     இப்படியாக, இதையும் சற்று பயின்றால் உபயோகமாக இருக்கும் என்ற எண்ணம்  சில நாட்களாகவே  மனதில் ஓடிக் கொண்டிருந்தது.  Wacom, Huion  என்கிற இரண்டு நிறுவனங்கள் இதில் பலத்த முன்னேற்றம் கண்டுள்ளன. இதில் Huion 610 என்னும்  தகடு சற்றே மலிவான விலையில் கிடைத்ததால் ($ 60) உடனே ஒன்றை வாங்கிவிட்டேன். இதற்கு ஏழெட்டு மாதங்களுக்கு முன் சுமார் ரூ.6500 க்கும் அதிகமாக இருந்தது.

அதில் வரையப்பட்ட முதல் பயிற்சிப் படம்தான் நீங்கள் இங்கே பார்ப்பது. இது கணினியிலே ஆரம்பிக்கப்பட்டு கணினியிலேயே முடிக்கப்பட்ட சித்திரம். 

    இதில் வரையப்பட்டுள்ள மரம் மேபிள் ( Maple).   மேபிள் மரம் குளிர் அதிகமாக நிலவும்  கனடா, வட அமெரிக்கா, ரஷ்யா, ஜப்பான் போன்ற  பூமியின் வட பாதியிலும் ஆஸ்திரேலியா போன்ற தென் பாதியிலும் அதிகமாக காணப்படுகிறது.  இது அப்பகுதிகளில் வசந்த காலத்தில் தளிர்விட்டு கோடையில் முழுவதும் பச்சையாக காட்சியளிக்கும். பின்னர் பருவமாற்றங்களுக்கு ஏற்ப இலைகள் பழுத்து மஞ்சள் ஆரஞ்சு பின்னர் சிவப்பு வர்ணத்திற்கு மாறி  பனி பொழியும் போது இலைகளை உதிர்த்து விடும். 


    சாலைகளில் இருபுறமும் இவைகள் காட்டும் வர்ணஜாலம் ஓவியர்களுக்கும் புகைப்பட ஆர்வலர்களுக்கும் மற்றும் சுற்றுலா பயணிகளுக்கும் கண்ணுக்கு விருந்தாகும். 10 மீ உயரத்திலிருந்து 30 மீ உயரம் வரை வளரும் இம்மரங்கள் இதற்காக எடுத்துக் கொள்ளும் காலம் 25லிருந்து 30 வருடங்கள் வரை ஆகும்.

   பனைமரத்தில் நுங்கு பிஞ்சை கீறி  பதநீரை வடித்தெடுப்பதைப் போல
மேபிள் சருக்கரை என்பது அதன் காய்கள் மூலம் பிரித்தெடுப்பது என்று நினைத்திருந்தேன். ஆனால் அது முற்றிலும் தவறு.

    மேபிள் அடிமரத்தை  துளையிட்டால் அதிலிருந்து இனிப்பான நீர் வடிகிறது. அது 2% சருக்கரை அளவு கொண்டது. அதாவது இதற்காக மரம் ஏறி இறங்க வேண்டியதில்லை.
   இதை நன்றாகக் காய்ச்சி பாகு வடிவில் விற்பதை ஒரு முக்கியத் தொழிலாக பலர் இந்நாடுகளில் செய்து வருகின்றனர். ஏறக் குறைய நம் நாட்டில் ரப்பர் தோட்டங்களில் ரப்பர் பாலை வடித்தெடுப்பது போலத்தான் இது.

மேபிள் மரம் நல்ல மரச்சாதனங்கள்,  இசைக்கருவிகள் தயாரிக்கப் பயன்படுகிறது.  கனடா தேசத்தின் கொடியில் இம்மரத்தின் இலையை பொறித்துள்ளனர். அந்நாட்டின் உயர்ந்த ராணுவபதக்கங்களிலும் இதன் இலச்சினை உள்ளதென்றால் இம்மரத்தை எவ்வளவு உயர்வாகப் போற்றுகின்றனர் என்பதை அறியலாம்.
.
இந்த மரம் இந்தியாவில் இருப்பதாக தகவல் இல்லை.

சித்திரமும் மவுஸ் பழக்கம்-4

சமீபத்தில் நண்பர் ஒருவர் கேட்டுக் கொண்டதன் பேரில் ஒரு பள்ளி மாணவர்களுக்கான கதைக்கு சித்திரம் வரைந்து கொடுத்தேன்.
முற்பகல் செய்யின் பிற்பகல் விளையும் என்பதே அதன் தாத்பரியம்.

தம்பி மீது அபாண்டமாக பழி சுமத்திய அண்ணனுக்கு  அன்றே பள்ளியில் ஒரு அபாண்டமான பழி வந்து சேர்கிறது. தாயின் அன்பு போதனையால் அண்ணன் தவறை உணர்ந்து மன்னிப்பு கோருகிறான். இது தான் கதை.

இதற்கான படங்களை ஒரு காமிக் ஸ்டிரிப் வடிவத்தில் கறுப்பு வெள்ளையில் வரைந்து அனுப்பிய பிறகு அதற்கு  ஃபோட்டோ ஷாப்-பில் வர்ணம் பூசி பார்க்கலாமே என்று தோன்றியது. எனக்கு புதியது அதனால் ஆர்வம் அதிகம். அதில் பல ஜித்தர்கள் whatsapp--ல் கலக்கிக் கொண்டிருக்கிறார்கள் என்பது வேறு விஷயம்.

இது வரை M S Paint-ல்  மட்டும்  கொஞ்சம் பழகியிருந்தேன். ஆனால் வித விதமான பிரஷ்கள், எளிமையான நுட்பங்கள், பல படங்களை ஒன்றாக்கி செய்யும் வித்தைகள் எல்லாவற்றையும் போட்டோ ஷாப்பில் செய்யலாம் என்று கேள்விப்பட்டு அதை ஒருவர் மூலம் என் கணினியில் தரவிறக்கம் செய்து கொண்டேன்.

முதலில் கறுப்பு வெள்ளைப் படம் :

பின்னர் இதே படத்தை பிரித்து தனித்தனி படங்களாக  ஃபோட்டோ ஷாப் மூலம்  வர்ணம் பூசினேன். அதன் விளைவு

ஓவியம் வரையத் தெரியாது  ஆனால் நல்ல வர்ண ரசனை உண்டு     என்பவர்களுக்கும் கூடவே பொறுமையும் இருப்பவர்களுக்கு  இது ஒரு நல்ல தொழில் நுட்பம். குறிப்பாக விளம்பரத்துறையில் இருப்பவர்களுக்கு இதன் தேவை அதிகம் என்று நினைக்கிறேன்.  

( click the pictures  in larger size)

எனக்கு இதில் தென்பட்ட வசதிகள் என்ன வென்றால்  சுலபமாக  வேண்டாத பகுதிகளை வெட்டி எடுப்பது, எல்லைகளை குறிப்பிட்டு அதனுள் வர்ணங்களை நிரப்புவது,  வர்ணத்தை வெவ்வேறு அடர்த்தியில் பூச முடிவது போன்ற இவ்வசதிகள் MS Paint -ல் கிடையாது. கூடவே cloning smudging  போன்ற வசதிகளும் உண்டு.

ஆனால் ஒரு கிரேயான் அல்லது வர்ண பென்சில் துணையுடன் 10 அல்லது 15 நிமிடங்களுக்குள் முடிய வேண்டிய காரியத்திற்கு மணிக்கணக்காக  மெனக் கெட வேண்டுமா என்று தோன்றுகிறது.

ஏதேனும் காரணத்தால் மூலப்பிரதி கெட்டுப் போயிருந்தால் அதை சீர்திருத்துவதற்கு இதைப் போன்ற மென்பொருட்கள் கண்டிப்பாக பயன்படும்.

சித்திரமும் மவுஸ் பழக்கம் -3

அப்பாடா ! ஒருவழியா ரொம்ப நாளா ஆசைப்பட்டதை இந்த படத்தில ஒரு மாதிரியா தீர்த்துக்கிட்டேன். அதாங்க கணிணியில MS Paint வைச்சு முழுக்க முழுக்கப் பயன்படுத்தி ஒரு நல்ல படத்த (அதாவது மனுசன், பறவை, பிராணி) வரையணும்னு முயற்சி பண்ணி பண்ணி திருப்தி இல்லாம விட்டுடறதே வழக்கமா இருந்தது. மவுஸ் கண்ட்ரோல் எப்படின்னு பிடிபடாமலே இருந்திச்சு.

தொழில் ரகசியம் பிடிபட்டவுடனே உற்சாகம் வந்திடிச்சு. நான் ரகசியம்-ன்னு சொல்றத கேட்டு ‘பூ இது தானா எங்களுக்கு எப்பவோ தெரியுமே’ன்னு சிரிக்காதீங்க. நான் கொஞ்சம் ட்யூப் லைட்.



தொழில் ரகசியம்ன்னு சொன்னதை இப்ப போட்டு ஒடச்சுடறேன்.
ரெடி ஒன் டூ த்ரீ...

Z O O M ..... Z O O M

ஆமாங்க. MS Paint -ல ZOOM மெனுவை பயன்படுத்தி மைன்யூட்டா படத்தோட லைன் எல்லாம் கண்ட்ரோல் பண்ணலாம். அதுல கலர் ஷேட் கன்ட்ரோல், அழிச்சு சின்னச் சின்ன மாற்றமெல்லாம் பண்றது எல்லாம் நல்லா செய்யலாம்.

அதாவது அடிப்படை அவுட்லைன்-ஐ ஸ்க்ரீன் அளவே வச்சுகிட்டு அப்புறம் தேவைப்பட்ட இடத்தை அப்பப்ப zoom பண்ணி கொஞ்சம் கொஞ்சமா வழிக்கு கொண்டு வந்துடலாம்.

இந்த முதல் முயற்சியில மூத்த குடிமகனார் ஓரளவு எனக்கு பிடிச்ச மாதிரி போஸ் குடுத்துட்டார். அடுத்து என்ன முயற்சிங்கறத இனிமே தான்யோசனை பண்ணணும். அது வரைக்கும் bye bye. :)))